OPS2007-ban-balita.jpg (34469 bytes)


Walang bagong nakaligtas o bangkay na nakuha sa kinalubugan ng barko sa may Vietnam, sabi ng Palasyo
 
Tatlong araw matapos lumubog ang isang Bahamian cargo ship sa may dalampasigan ng Vietnam, walang bagong nakaligtas o bangkay na natagpuan, sang-ayon sa isang pinuno ng Malacanang Lunes.

“Ang pinakahuling ulat buhat sa Embahadang Pilipino sa Hanoi ay nagsaad na walang bagong bangkay na nakuha o nailigtas na tao buhat sa kinakitaan ng unang dalawang bangkay na ngayon ay nasa Lungsod ng Ho Chi Minh, at ng isa pang nailigtas,” wika ng Tagapagsalita ng Pangulo Edwin Lacierda sa pulong balitaan sa Malacanang.

Ayon kay Lacierda, salig sa ulat ng Lakas Pandagat ng Vietnam, nagdagdag pa sila ng tatlong helikopter para makatulong sa paghahanap na ginagawa at nanawagan sa iba pang mga bansa sa pook na nasabi na tumulong sa pagsisikap na matagpuan ang iba pang lulan ng lumubog na bapor.

“Itinanong natin sa Kalihim ng Tanggulang Pambansa kung maaari tayong tumulong. Tini-tingnan ngayon,” sabi pa ni Lacierda.

Idinagdag pa ng Tagapagsalita ng Pangulo na ang Embahadang Pilipino at ang Pandangal na Konsul Heneral sa Lungsod ng Ho Chi Minh ay nakikipag-ugnayan sa ahente ng bapor tungkol sa pangyayaring ito.

Ang bapor-pangkargada na Bulk Jupiter ay lumubog noong Biyernes mga 150 nautical miles ang layo sa Lungsod ng Vung Tan habang naglalakbay papuntang Tsina buhat sa Malaysia.

Alinsunod sa mga ulat, pawang mga Pilipino ang tauhan o crew ng naturang bapor. PND(ag/zaf)

TOP