OPS2007-ban-balita.jpg (34469 bytes)



Pinagtibay ng Pangulong Aquino ang P167.5 bilyon para sa rehabilitasyon ng Silangang Kabisayaan
 
Pinagtibay ng Pangulong Benigno S. Aquino III Miyerkoles ang P167.5 bilyong Comprehensive Rehabilitation and Recovery Plan (CRRP) na katibayan nang puspusang malasakit ng pamahalaan para maitayong muli ang mga sinalanta ng Bagyong Yolanda sa Silangang Kabisayaaan noong nakalipas na taon.

Sa mungkahi ng Presidential Assistant for Rehabilitation and Recovery at pagtataguyod ng National Economic Development Authority, pinagtibay ng Pangulo Miyerkoles, ika-29 ng Oktubre 2014 ang 8,000-pahinang Yolanda Comprehensive Rehabilitation and Recovery Plan na nagtatakda ng pagsasakatuparan ng Pamahalaang Pambansa sa pagsasagawa ng mahigit na 25,000 na mga tiyakang panukala, mga programa at gawaing tungo sa pagbabagong tatag,” wika ni Kalihim Herminio Coloma, Jr. ng Presidential Communications Operations Office sa inilabas niyang pahayag.

Sinabi ni Kalihim Coloma na ang panukalang pagbabagong tatag ay naglalayong lubusang maayos ang 171 mga lungsod at bayan sa 14 na lalawigan at anim na rehiyong tinaguriang Yolanda corridor alinsunod sa patakarang “build-back-better.”

“Nakatuon ang panukalang pagbabagong tatag sa pangmatagalan at puspusang pagsisikap na maging higit na matatag ang kakayahan ng mga pook na ito sakaling muling dalawin ng ano mang panganib na bunga ng sama ng panahon,” sabi pa ni Coloma.

Kabuuang P167.9 bilyon ang halagang kailangan na hahati-hatiin upang maitayong muli ang nawasak na mga imprastraktura na P35.1 bilyon; P26.4 bilyon sa palingkurang panlipunan; P75.7 bilyon para sa resettlement; at P30.6 bilyon naman sa kabuhayan. PND (as/zaf)

TOP