OPS2007-ban-balita.jpg (34469 bytes)



Nagpahatid ng pakikiramay ang Palasyo sa pamilya ng pinaslang na saksi sa ‘Maguindanao Massacre’
 
Nagpahatid ng pakikiramay ang Malacanang sa pamilya ng pinaslang noong Martes na saksi sa Maguindanao Massacre.

Tinambangan ng mga sandatahang lalaki Martes ang dalawang potensiyal na saksi sa nasabing 2009 massacre. Nasawi sa pamamaslang si Dennix Saksi, dating tsuper ng pangunahing pinaghihinalaan na naging Alkalde Andal Ampatuan, Jr. ng bayang Datu Unsay. Ang isa pang saksi, si Butch Saudagal, na sinasabing bagman ni Ampatuan, ay sugatan naman at kasalukuyang nakaratay sa hindi binanggit na pagamutan.

“Nakikiramay kami sa kanilang mga pamilya. Ibig naming malaman ang iba pang bagay sa testimonya ng dalawang tinambangan kahapon,” sabi ni Deputy Presidential Spokesperson Abigail Valte sa pulong balitaan sa Malacanang Miyerkoles.

Tiniyak ni Valte sa madla na ang iba pang handang sumaksi sa kasong ito ay pangangalagaan.

“Natitiyak kong si Kalihim Leila De Lima, habang nag-uusap tayo, ay gumagawa na ng hakbang para matiyak ang kaligtasan ng lahat ng iba pang mga saksing magsasalaysay sa panig ng pamahalaan,” pahayag pa ni Valte.

Noong Nobyembre 23, 2009, ang mga kamag-anak ni Gobernador Esmael Mangudadatu ng Maguindanao, ang mga tagapagtaguyod niya at mga tauhan ng media ay sakay ng magkaka-sunod na sasakyan patungo sa kapitolyo ng lalawigan nang sila ay tambangan.

Ang maybahay ng Gobernador, si Genalyn, ay siya sanang maghaharap ng katibayan sa pagkandidato ng kanyang kabiyak ng puso sa Shariff Aguak, ulung-lungsod ng Maguindanao,

Kabuuang 58 katao ang napatay sa pananambang na ito, kabilang na si Genalyn at ang 32 mamamahayag na kukuha ng balita sa gagawin sanang paghaharap ng kandidatura sa tanggapan ng Komisyon sa Halalan sa naulit na lalawigan.

Ang pananambang umano ay utos ng mga kalaban sa pulitika ng mga Mangudadatu, ang mga Ampatuan. PND(ag/zaf)

TOP


Tiwala ang Pangulong Aquino na makalalampas sa masusing pagsusuri ang kasunduang pantanggulan sa pagitan ng Pilipinas at Amerika
 
(SINGAPORE) Nagtitiwala ang Pangulong Benigno S. Aquino III na makapapasa sa pinakamahigpit na pagsusuri ng hukuman ang Enhanced Defense Cooperation Agreement (EDCA) sa pagitan ng Pilipinas at ng Estados ngayong sinimulan na ng Kataastaasang Hukuman ang oral arguments tungkol dito.

“May kompiyansa kami na ang ginawa namin ay naaalinsunod sa ating Saligambatas at may pangangailangan dito. Ang kailangang talaga ng ating bayan ay ang ganitong klaseng kasunduan na dagdag lamang sa mga nauna nang kasunduan,” sabi ng Pangulong Aquino sa mga reporter na buhat sa Maynila sa panayam sa kanya Martes ng gabi rito.

Ang EDCA ay isang 10 taong kasunduang militar na nilagdaan nina Kalihim Voltaire Gazmin ng Tanggulang Pambansa at Embahador Philip Goldberg ng Estados Unidos sa Pilipinas noon pang Abril 26 nang magsagawa ng state visit ang Pangulong Barack Obama ng Estados Unidos sa Pilipinas.

Ang pakay nito ay upang palakasin pa ang ugnayang panseguridad sa pagitan ng Pilipinas at ng Estados Unidos sa pamamagitan ng pagpapahintulot na makapagtalaga ng mga kawal Amerikano at magsagawa ng operasyon sa bansa nang hindi na maglalagay ng palagiang base rito.

Inulit ng Pangulong Aquino na ang EDCA ay upang “ayusin” ang mga naunang kasunduan sa pagitan ng Pilipinas at ng Estados Unidos na tulad ng Mutual Defense Treaty at ang Visiting Forces Agreement.

“Kaya kung tama ang dalawang iyon at itong EDCA ay parang paglilinaw nga ng mga detalye roon, bakit naman dapat maging salungat ito?” Pahayag pa ng Pangulong Aquino.

Binanggit ng Pangulong Aquino na nakausap niya ang dalawa sa nagharap ng petisyon laban sa EDCA, bagaman hindi niya binanggit ang mga pangalan, at sila ay nagkaunawaan matapos na maliwanagan ang paninindigan ng bawa’t isa sa kanila tungkol sa bagay na ito.

“Mga kakampi natin sila at tila para bang nagkaiba ang posisyon namin. Nagkausap kami. Ang sarap na pareho pa rin ang pananaw. At sabi nila, sana nagkausap tayo bago nasubo rito. Kailangang ituloy na lamang namin ito,” wika pa ng Pangulo. PND(hdc/zaf)

TOP


Nakaaakit ng dagdag na mga imbestor sa Pilipinas ang mga repormang ginawa ng gobyernyo, sabi ng Pangulo
 
Patuloy na nagpapakita ng interes sa pamumuhunan o pagpapalawak ng puhunan sa Pilipinas ang mga dayuhang kompanya dahil sa mga repormang isinasgawa ng pamahalaang Pilipino, sabi ng Pangulong Benigno S. Aquino III Miyerkoles.

Binigyang diin ng Pangulong Aquino sa mensahe pagdating niya buhat sa dalawang araw na pagdalaw sa Singapore na maraming mga negosyanteng nakausap niya sa Singapore ang nagagalak sa mga pagbabago sa Pilipinas na dahilan para mahimok silang mamuhunan sa bansa.

Ang mga grupong nakausap ng Pangulo ay kinabibilangan ng Singapore Business Federation at ang mga chambers of commerce ng Europa, Great Britain, Estados Unidos, Hapon at India, gayundin ang Europe-ASEAN Business Alliance, International Enterprise Singapore at ang Philippine-Singapore Business Council.

“Ang Keppel Offshore and Marine Ltd. na paggawa ng bapor ang industriya ay ibig ding maglagak ng salapi sa Pilipinas,” sabi pa ng Pangulo.

“Hindi lamang po sila nakontento sa tagumpay ng naturang industriya. Balak pa nilang lalong mamuhunan sa atin. Patunay na rito ang paglalagay nila ng kauna-unahang oil rig sa bansa,” dugtong pa ng Pangulo.

Binanggit din ng Pangulo na ang Singapore Airlines Engineering Company (SIAEC) na nasa larangan ng aircraft maintenance, overhaul at pagkukumpuni ay nais ding palawakin pa ang kanilang gawain sa Pilipinas.

Noong 2005 nagsimula ang kompanyang ito sa Pilipinas at nakapaglagay na sila ng $25 milyon noong 2009 para palawakin ang operasyon nila.

Sang-ayon sa Pangulong Aquino, kasalukuyang tinatapos ng SIAEC ang pangatlong hangar nito sa Pilipinas na nagkakahalaga nang halos $21 milyon at nagbabalak pa na magtayo ng dalawa pang hangar sa susunod na taon.

“Bukod sa maghahatid ang mga ito ng dagdag na empleyado, pinatutunayyan nito na talagang world class ang manggagawang Pilipno. Ang pagpapatakbo nga sa ganitong mga pasilidad ay nangangailangan ng natatanging technical expertise para sa malalaking eroplano. Sa susunod na taon ay kasama na ang Airbus 330 at Boeing 777 sa maseserbisysuhan ng SIAEC sa ating bansa,” dagdag pa ng Pangulo.

Sinabi ng Pangulo na aatasan niya ang Kagawaran ng Paggawa at Hanapbuhay, Commission on Higher Education (CHED) at ang Technical Education and Skills Development Authority (TESDA) na makipag-ugnayan sa SIAEC para matiyak na masasamantala ng mga Pilipino ang pagkakataong makapagtrabaho sa kompanya ng Singapore ukol sa larangang ito.

Iniulat din ng Pangulong Aquino na nakapulong niya noong Miyerkoles ang dalawa sa pinaka-malaking investment fund groups sa Singapore na Temasek at Government Investment Corporation (GIC).

“Ang Temasek ay may puhunan sa iba-ibang industriya sa Pilipinas at inaasahang daragdagan pa nito ang isang bilyong dolyar na puhunan nito sa bansa sa lalong madaling panahon, samantalang ang GIC naman ay magdaragdag ng P17.6 bilyon sa kompanyang Pilipino na Emperador Inc.,” dugtong ng Pangulo.

“Ang sabi nila sa atin, dati nga, intereado ang GIC sa imprastraktura, real estate at telekomunikasyon. Ngayon at maglalatag sila ng puhunan sa isang consumer-driven na kompanya, ipinamamalas nilang talagang ayos mamuhunan sa merkadong Pilipino,” sabi pa ng Pangulo.

Binanggit din ng Pangulo ang pagpunta niya sa Jollibee sa Lucky Plaza sa Singapore kaugnay ng kanyang paglalakbay roon. Ang Jollibee, sabi ng Pangulo ay matagumpay sa naturang bansa at ang balak ng mga taga-Singapore na kasosyo ng kompanya ay magbukas ng sangay sa Malaysia.

“Wala pong alinlangan. Ang dating itinuturing na 'Sick Man of Asia' ay aktibo at masiglang bahagi na ngayon ng paghahanda para sa ASEAN Economic Integration na magaganap sa taong 2015,” masayang pahayag ng Pangulo.

“Dahil pangmatagalan ang hinahabol nating transpormasyon, tiyak na hanggang sa mga susunod na henerasyon, aanihin ng mga Pilipino ang bunga ng mga ipinunla nating binhi ng pagbabago,” mariing wika ng Pangulo.PND(as/zaf)

TOP


Hiniling ng Pangulong Aquino sa mga kompanya ng Singapore na dagdagan pa ang mga puhunan nila sa Pilipinas
 
(SINGAPORE) Hiniling ng Pangulong Benigno S. Aquino III sa mga pangunahing negosyante rito na samantalahin ang mga repormang pang-ekonomya ng kanyang pamahalaan na ipinatupad sa nakalipas na mga taon upang palakihin pa ang negosyo nila sa Pilipinas.

“Para sa inyong tumaya na sa Pilipinas, hinihiling kong taasan ninyo ang inyong mga puhunan. At para naman sa mga gumagawa pa ng pag-aaral, ang masasabi ko lamang: ito na ang panahon,” wika ng Pangulo sa pakikipagpulong niya sa mga negosyante na idinaos sa Shangri-La Hotel dito.

Ipinaalaala ng Pangulong Aquino ang una niyang pananawagan sa mga imbestor na taga-Singapore sa state visit niya rito noong 2011 nang ang pamahalaan niya ay nasa yugto pa lamang ng pagbalangkas ng mga reporma sa ekonomya.

Binanggit niya ang maraming proyektong public-private partnership (PPP) na handa na para isubasta, ang pagbalangkas ng mga patakaran upang mapagaan ang pagpasok ng mga foreign carriers, ang pag-aayos ng aviation industry ng Pilipinas, gayundin ang pagbabagong ginawa sa pambansang badyet ng 2011 para dagdagan ang pondo ukol sa serbisyong panlipunan.

Iniulat ng Pangulong Aquino na pagkalipas ng apat na taon, ang gross domestic product ng Pilipinas ay matatag ang pagsulong sa kabila ng mga kalamidad na sumagasa sa bansa tuwing magtatapos ang taon sa panahon ng panunungkulan nila.

“Ngayon, kami na ang pangalawa sa pinakamabilis sumulong na ekonomya sa mga pangunahing bansa ng Asya. Ang GDP namin ay umabot sa 6.4 porsiyento sa ikalawang kuwarter ng taong ito na pangalawa sa Tsina at katulad ng sa Malaysia. Ang pananaw ukol sa ekonomya ng Pilipinas ay tunay na positibo dahil sa pag-unlad na natamo na namin hanggang sa panahong ito,” sabi ng Pangulo.

Kung ihahambing sa mga sinundan niya na umasa lamang nang labis sa perang ipinauuwi ng manggagawang Pilipino na nasa ibang bansa, sinabi ng Pangulong Aquino na ang pag-unlad sa kasalukuyan ay bunga ng palaking pamumuhunan, kaya ang pananalapi ng bansa ay higit na balance at matatag.

“Tulad halimbaswa ng ating isinusulong na mga proyektong PPP, bago kami nanungkulan, ito ay umabot lamang sa anim na proyekto sa ilalim ng nakalipas na tatlong administrasyon. Sa ilalim ng pamumuno namin, mayroon na kaming walo at 15 pa ang inihahanda, bukod sa dag-dag pang 30,” sabi ng Pangulo.

Inulit ng Pangulo na ang gugulin sa imprastraktura ay mahigit na nadoble sa administrasyon nito. Ito ay buhat sa P200.3 bilyon noong 2011 ay naging P404.3 bilyon ngayong taong ito, at ang balak niya ay paabutin ito sa P787.19 bilyon pagbaba niya sa tungkulin sa 2016.

Sumigla rin, sabi ng Pangulo, ang manufacturing industry, gayundin ang sektor ng business process outsourcing, semi-conductors at electronics, at ang turismo.

Binigyang diin ng Pangulong Aquino na sa pamamagitan ng inilatag na Pocket Open Skies Policy naging magaan para sa mga imbestor na magsadya at dalawin ang Pilipinas maging ito man ay para sa pagnenegosyo o paglilibang.

“Tunay na umangat ang aming ekonomya. Namamayani ang pag-asa sa aming paligid na hindi kailanman naranasan, at ang pag-asang ito ay magiging kongkretong benepisyo at pagkakataon para sa bawa’t isa sa aming mga kababayan,” wika pa ng Pangulo.

“At sa napipintong integrasyon ng komunidad ng ekonomya ng ASEAN (Association of Southeast Asian Nations), magiging ibayo ang sigla at lalawak ang pagkakataon para sa iba pa sa rehiyong ito,” dugtong pa ng Pangulong Aquino. PND(hdc/zaf)

TOP


Patuloy na pangangalagaan ng gobyerno ang karapatang pantao
 
Nananatiling matatag ang paninindigan ng pamahalaan na ibantayog ang pamamayani ng batas at pangalagaan ang karapatang pantao habang palapit ang pagdiriwang ng International Human Rights Day, sang-ayon kay Kalihim Herminio Coloma, Jr. ng Presidential Communications Operations Office Huwebes.

“Determinado ang administrasyong Aquino na ipatupad ang batas at pairalin ang pagkilala sa mga karapatang pantao,” wika ni Kalihim Coloma sa pulong-balitaan Huwebes nang tanungin siya kung puspusang matitiyak ng administrasuon na iginagalang ang karapatang pantao sa bansa.

“Ang ating Pangulo ay miyembro ng isang pamilya na tuwirang dumanas sa kanilang personal na kapasidad ng mga kahalintulad na human rights violations, kaya hindi makatuwirang sabihin na siya ay hindi tumatalima sa mga prinsipyo ng batas na nagbibigay ng proteksiyon sa mga karapatang pantao,” paliwanag ng Kalihim.

Binanggit ni Coloma na sa ilang yugto ng kasaysayan, ang Sandatahang Lakas ng Pilipinas ay napulaan dahil sa pagiging kasangkapan sa laganap na paglapastangan sa karapatang pantao, lalo na noong panahon ng martial law.

Gayunman, malaking pagbabago na ang naganap sa nakalipas na mga taon, sabi ni Coloma, at idinugtong na ngayon, kinikilala na ng militar ang katutubong karapatan ng sino man sa ilalim ng batas.

Tinukoy ng Kalihim na ang Hukbong Katihan ang nagtayo ng Aquino-Diokno Shrine sa kamponilangFort Magsaysay upang magsilbing tagapagpagunita na kinikilala ng militar ang halaga ng karapatang pantao.

Sa Fort Magsaysay nakulong ang mga dating senador Benigno S. Aquino, Jr. at Jose Diokno na kumalaban sa martial law.

Ayon pa kay Coloma, ginawa ng militar ang nasabing kulungan (detention facility) na isang dambana upang magsilbing tagapagpagunita sa sambayanang Pilipino ng halaga ng pakikibaka para sa karapatang pantao, lalo na ng ama ng Pangulo.

Kung sakaling may lumalapastangan sa karapatang pantao, pagbibigay-diin ni Coloma, ang mga biktima ay maaaring dumulog sa angkop na ahensiya ng pamahalaan.

“Umiiral ang demokrasya at umiiral ang rule of law sa ating bansa. Mayroong mga usapin na naiharap na laban sa mga nagsagawa ng mga tinatawag na extra-judicial killings. Mayroon tayong Komisyon sa Karapatang Pantao. Patuloy ang pagtalima natin sa mga pandaigdig na kasunduan at conventions on human rights bilang kasapi ng Bansang Magkakaanib,” paliwanag pa ni Coloma.

Sinabi ni Coloma na hindi makatuwiran para sa isang tao o grupo ng mga tao na magsabing laganap ang paglabag sa karapatang pantao sa bansa.

“Kailangang suriin ang kongkretong rekord bago gumawa ng ganyang mga pahayag,” sabi pa ni Coloma. PND(as/zaf)

TOP